Гонарам рускага народа заўсёды быў выдатны пісьменнік-псіхолаг Фёдар Міхайлавіч Дастаеўскі. Яго творы і твочасць ведаюць ва ўсім свеце. Вобразамі, якія ён стварыў, захапляліся і захапляюцца мільёны чытачоў. Творы “Злачынства і пакаранне“, “Ідыёт”, “Падлетак“, “Бедныя людзі“ даўно сталі класікай рускай літаратуры. А яго героі Радыён Раскольнікаў, Соня Мармеладава, Леў Мышкін, Варвара Навасёлава пакарылі чытачоў шырынёй сваёй душы і тонкім псіхалагізмам.
Але многія прыхільнікі творчасці Фёдара Міхайлавіча Дастаеўскага нават не здагадваюцца, што продкі выдатнага пісьменніка на працягу некалькіх стагоддзяў пражывалі на тэрыторыі Іванаўскага раёна ў вёсцы Дастоева. І гэты выбітны і таленавіты род паходзіць менавіта з нашай беларускай зямлі. Таму для многіх шанавальнікаў рускай класікі будзе вельмі цікава наведаць музей.
Музей Дастаеўскага 25 лютага наведалі і мы, вучні старэйшых класаў Адрыжынскай сярэдняй школы. Наш экскурсавод Пуцыковіч Валянціна Уладзіміраўна распавяла нам гісторыю рода Дастаеўскіх, паказала цікавыя артэфакты, якія звязаны з сям’ёй і лёсам самога пісьменніка. Мы даведаліся шмат цікавага пра творцу і яго продкаў,пашырылі свае веды пра творчасць Фёдара Міхайлавіча Дастаеўскага.
Дзякуючы экскурсіі мы яшчэ раз упэўніліся, наколькі багата талентамі наша іванаўская зямля.
Сарока Вольга, вучаніца 11 класа